الوصيه

يعني ياجماعه برضه الإحتياط واجب و محدش ضامن الظروف،و بصراحه كده أنا راجل خلقي ضيق و المخبرين كتير و سلالم العمارات ف الحته اللى انا ساكن فيها كلها جرانيت و رخام .. أينعم أنا بقرف أدخل أى نت كافيه بس أهو … محدش ضامن الظروف ، طرطقوا ودانكوا بقى و إسمعوا وصيتي :

  1. لو شنعوا عليا ولاد الكلب دول أحب أقولكم بالنسبة للبانجو و لفافاته و باكتاته أنا مليش فيه ، إنما باكل لبان كلورتس كتير .. و ده بالتأكيد بالتأكيد ممكن يعمل أسفكسيا لو كنت واكل توم قبليه .
  2. فكي التحتاني ملزوق بأمير بعد آخر حادثه حصلت لي و أنا ماشي بالجمل على 180 الصيف إللى فات وأنا مسافر هولندا . إذن بالنسبة للمسعفين ياخدوا بالهم كويس و هما بيشيلوني عشان ما تلزقش ف الآخر ف الداخليه لو وقعت منهم و إتفك اللحام لا قدر الله.
  3. عنيا بتورم بصورة دورية و منتظمة كل سبت و إتنين و أربع.
  4. سناني ضعيفه جدا جدا و بتتكسر كل ما أكح .. و لأن الحاجه الوحيده إللى هعملها قبل حفلة الشاورمه إنى هكح معاهم .. فطبيعي جداً إنكوا ما تلاقوش صفين سناني.
  5. أى سحجات أو كدمات أو تورمات أخرى يسأل عنها الكفتجي الشرعي إللى هيشرحني و أكيد هيلاقيلها مخرج بأذن الله.
  6. المظاهرات و الجروبات و التويتات عني ممنوعه لحد السنوية التالته.

و الله على ما أقول حسبي و نعم الوكيل