فجر

يا ما نفسي أقول كلام يوجع
و الحلم تاني يعود يرجع
تغيير رئيس .. برئيس يسمع
و الحلم أمه تعود للرجال مصنع
مع بعد ما بقت للكلاب مطمع
يا أمي قومي ضناك محتاج يرضع
لبن الصباح و الشمس راح تسطع

يا ضنايا ضهري محني
و من ذل السنين بركع
إزاي إشيلك تطول صدري
و إزاي دماي فى العروق تجري
و إزاي أرسم بسمتك فجري
إزاي يا ضنايا و دراعي متقطع

أنا يا أمي بكيت بليل
و دموعي نزلت دم
تجري سواد فى النيل
البرد جمد ميته و طفى قناديل
و الشبك على شطه داب
و لا حتى رزق قليل
يسد جوع حريتي
و لساني م الهم تقيل

صورتك يا ولدي لحظة حياتك
يوم ميلادك
منقوشه فخيالي
و كنت وقتها بتوضا
شفت إبتسامتك
و ف كف إيدك ورده
شميت عبيرها و الآذان ينادي
الله أكبر
يا رب أشوف ضنايا
بحق الدعا و السجده
بكينا إنت و أنا
مع أول نفس ليا و ليك
أنا عشت ميته و حياتي بدأ بيك
رضيت أنا ينهشوا لحمي
كان كل همي فيك
و هرضى تاني
ينهشوا تاني……
لأ
لأ يا أمي و الله ما أرضى

الشمس طلعت يا أمي
سامعه نداها؟
الدفا جاي أهو
و جايبه الضحك و ياها
أنا مش ناسيها يا أمي
و لا يمكن أنساها

لأ يا أمي و الله ما أرضى بهوانك
لأ يا أمى و الله ما انا ساكت
و لو مقدرتش آخد م الكلاب تارك
عزاي إن الكلب الكبير قيامته هانت

إبراهيم عبد الغني
فبراير 2010