يا دكتور حمار .. يا دكتور حرامي

خلصت البكالوريوس في مايو 2005 بتقدير عام جيد و تقدير جيد جداً فى مادة طب أسنان الأطفال ، و اللوائح فى كل الجامعات بتشترط أن يعدي 3 سنين بعد البكالوريوس عشان أقدر أسجل للماجستير و اللوائح فى وزارة الصحة بتشترط سنتين شعل فيها عشان أقدر أسجل.

و بما إنى إستلمت شغلي الأرياف فى يناير 2007 فمفيش قدامي مجالى للتسجيل غير في يوليو 2009 عشان أكون أستوفيت شروط الوزارتين للتسجيل.

فوضت أمرى لله على السنين اللى بتعدي من حياتى بالساهل كده و إستنيت لحد ما الوزارة فتحت باب التقدم للتسجيل فى أبريل 2009 و توكلت على الله و قدمت ورقى و أنا عارف أني لو إعتذرت فى أى وقت بعد ما قدمت ورقي “سوف يتم حرماني 3 سنوات من التقدم للتسجيل” .. يعني م الأخر المطلوب إنى أكون إنسان ملتزم مش بتاع تهريج أقدم النهاردة و أعتذر بعدها بيوم ، و أنا أظن فى نفسي إني الحمد لله مش بتاع تهريج فى الأمور دي.

و بعدها بشهرين رحت جامعة القاهرة أسئل على الأخبار فعرفت إن التسجيل هيبدأ كالمعتاد فى اول يوليو و إن المصاريف 1619 جنيه بالتمام و الكمال، قلت الحمد لله المبلغ غالى نسبياً بس أهو ربنا مقدرنى.

عدت الأيام و في نص الشهر بعتت الوزارة أسامينا للجامعة و رحت بقى (تحديداً يوم 21/7/2009) و أنا ف جيبي الفلوس و ف شنطتي الأوراق المطلوبة عشان أسجل …. و كانت الصدمة

المصاريف بقدرة قادر بقت 3619 جنية + 40 رسم شهاده (سنوياً)

اللهم لا إعتراض … دخلت أتأكد من الرقم من الموظفين لربما يكون فى خطأ فى الرقم و لكن للأسف الرقم صحيح و يدفع نقداً للخزينه سنوياً ، بل و قابل للزياده (على كلام أحد الموظفات)

الصدمة كانت صعبة بصراحة فكان أول واحد فكرت أروح له هو النقيب د/مراد عبد السلام و لكن للأسف لم أتحصل منه إلا على مواساه و كلمتين “ظلم بيّن و دي بلدك يابني .. دور على جامعة تانية”

رجعت الوزارة عشان أشوف حل عشان ماتحرمش 3 سنين فى حالة الإعتذار و خصوصاً إن الإعتذار هنا غصب عني مش بمزاجي .. و عشان ستر ربنا تبين لى إن طالما الجامعة ماردتش عليهم بقبولى فالإعتذار لن يكون مصاحب بعقوبة الحرمان .. و إعتذرت فعلاً

و تمت بحمد الله قصتي هذا العام مع الماجستير ، و لم أخرج منها إلا بعبارات المواساه من موظفات الدراسات العليا فى الكية و الوزارة و السيد النقيب المحترم .. و لله الأمر من قبل و من بعد

و بعد … آخد نفسي و أسأل ، أكون دكتور حمار و بلاها ماجستير و للا دكتور حرامي عشان أعرف ألم تكاليف الدراسه؟

*3659 جنيه > 300 جنية مرتبي × 12 شهر

رسوم التسجيل في الدراسات العليا للعام 2009
رسوم التسجيل في الدراسات العليا للعام 2009
رسوم التسجيل في الدراسات العليا للعام 2009
رسوم التسجيل في الدراسات العليا للعام 2009

14 thoughts on “يا دكتور حمار .. يا دكتور حرامي”

  1. الاختيار الصعب ده اتحل من زمان في مصر يا دوك، عندنا الناس الكبارة قرروا يكونوا حمير وحرامية في نفس الوقت وبكده انتفت العقدة.

  2. اولا ازيك يابراهيم ..ثانيا مين قالك ان الأسعار اتغيرت الأن انا دفعت الرقم ده وانا بسجل الدبلوم بنفس القسم في 2007
    ثالثا ده مش نهايه المطاف لانك لازم تكون عارف انك هتكع دم قلبك في ال requirments وبقيه الأدوات ومصاريف السفر وتصوير الورق والدروس الخصوصيه اللي هتلاقي نفسك مجبر عليها في بعض المواد واخيرا متنساش شويه لعب وهدايا وبلالين بما انك اخترت التخصص ده
    رابعا من طلب العلا سهر الليالي ولازم شويه صبر وتضحيات
    خامسا مش كان احسن لو كنت كملت في العياده …عموما الله يوفقك وعلي فكره انا نازل اجازه في رمضان يريت تكلمني

  3. يأخي هذه سياسية تطوير التعليم العالي في البلاد العربيه وهذه هي السياسيه الرشيده في تعزيز وتطوير التعليم العالي في بلادي العربيه حيث ان
    المواطن هومن يدفع ثمن تقدم وازدهار الوطن من جيبه الخاص في حين الميزانيه في الدول العربيه مخصصه من اجل نفاقات الدفاع عن امن النظام
    الحاكم في البلاد العربيه وطبعا مخصص ايضا من اجل اوكار الدعاره المنتشره اكثر من المدارس في هذه الامه وطبعا نحن الشعوب العربيه
    لنا حب في قضية الاختصار في كل شيئ في السياسيه والاقتصاد والاجتماع والفن والادب وحتى في العلاقات الجنسيه لدينا مختصره وانظر
    الى امر معين ان اي طلب تقدمه يقول لك من تقدم له الطلب دون حتى ان يقراء بأختصار ماذا تريد انت حصلة على شهاده معينه يجب البقاء على
    المستوى الذي وصلت اليه والاختصار على ذلك ان نالاختصا ر اصبح عقيده في هذه الامه الدوله مختصره بالزعيم ومن يرث الثكنه /الدوله/ بعده
    والاقتصاد مختصر على مجموعه معينه من رجال الاعمال والفن مختصر على مجموعه من الفنانين والادب كذلك وامر الدين كذلك مختصره
    على رجال دين على قياس النظام ياخي ان الامال والاحلام مسروقه ومحطمه في امتي مطلوب البقاء سير في المكان في هذه الثكنه التي اسمها
    الوطن العربي لاتحلم قديشكل حلمك خطر على الامن القومي العربي

  4. الله يعينك ياخي
    حرب تنزل الخليج و خصوصا السعودية فهي تهتم حتى بالاطباء الاجانب وتدخلهم برامج التدريب و التدرج الدراسي

  5. هههههههههههههههههههههههههههههههههههههههه

    شر البلية ما يضحك

    بس أنا احترمتك في حاجة , انك ما حضرتش في المنيا

    بس يا عيني حاول تحوش بقة المبلغ وتحاول مرة أخرى قبل ما يقولولك game over

  6. الحل تطلع سويسرا أو اي دولة اسكندنافيه ثانية تتعلم فيها ماجستير وحيعطولك مصروفك – يجي 3000-5000$ شهري.
    متغلطش – حيدوك فلوس – مش العكس.

    شكراً

  7. لا اعلم هل اضحك ام ابكى، و لكن هذا حال دولة يقال عنها انها دولة مؤسسات، مستحيل ان يصبح لنا شأن فى المستقبل طالما توجد هذه العراقيل الذى اصبح الكثير ينظرون اليها على انها مقصودة ، و لايمكن ان نقل عليها غباء ، حتى الغباء كان سيعطينا مزيدا من التسهيلات، اما ذلك فله اسم اخر…. الله المستعان اولا و اخيرا.

  8. تعال للخليج وخصوصا الكويت
    واعمل دكتور راتب قوي ومناطق مخصصه للمصريين ومميزات اخرى ولا كانك مغترب

  9. السلام عليكم ورحمة الله عليكم إذ سألت فاسأل لله وإذا إستعنت فستعن بالله … أخي الكريم توكل على الخالق فأنصحك بي أن تتوكل على الذي لا يموت ووفقك الله في عملك وحياتك والسلام عليكم ورحمة الله .

Comments are closed.