كل سنه و أنتم …أى حاجه

المتشائم دوماً و أبداًً

و طبعاً الهلال ف مصر لازم يكون دايماً الشريك المخالف

يعني العيد ف السعودية و فلسطين و ليبيا التلات و إحنا عندنا الأربع

مش عارف .. هو ليه هلال شوال دايماً مستقصدنا ؟

فى 21 يوليو اللى فات فتحت عيادتي الخاصة

و من ساعتها و أنا مش عارف أكلمكم زي الناس

هنشر لكم صورها قريب إن شاء الله

إنتقلت فى 16 سبتمبر لإدارة مكافحة العدوى بمديرية الصحة ف المنيا

يعني مسئولية تطبيق و تدريب و مراقبة و تفتيش البرنامج القومي لمكافحة العدوى ف 18 مستشفى ف المنيا بقت ف رقبتي أنا و مدير الوحدة و طبيبة تانية جايه ف السكه

فاكرين صور أبو سيدهم 😀

للأسف لسه مستشفى أبوسيدهم دي مش خاضعة للبرنامج ف مش تحت عنينا قوى

بس ف يناير 2009 يمكن ربنا يقدرني و أوفر لعيادة السنان هناك مستلزمات مكافحة العدوى أو أقفلها خالص و أريح الناس منها

دكاترة السنان إضحك عليهم تمام ف موضوع الزيادات الأخيرة لمرتبات الأطباء دي

يعني الطبيب المقيم الغلبان أبو فلنه مقطعه زودوه 350%

و إعتبرونا إحنا كبار و إخصائيين و زدنا 30% بس

مش عارف نقطع فلناتنا إحنا كمان و للا إيه؟

انا شفت النقيب الخميس اللى فات و كان على لساني أقوله حلوين شوية قصاقيص الجرايد اللى ملزقهم على حيطان النقابه

يعني المفروض الواحد لما يشوفهم يقول “الحمد لله .. و الله نقابتنا مش ساكته و النقيب هاري نفسه تصريحات و إنتقادات للوزير على الظلم اللى إتظلمناه فى الزيادات الأخيره”

الحمد لله إنى ربنا كرمنى بالعياده أوقفها على رجليها و يسهل لبتوع السنان اللى متخرجين جديد .. يبقوا يسرحوا بلب و سوداني

و عاش النقيب

مصر بقت عامله زي الراجل المكرمش اللى ف الصورة اللى فوق دي

مش عايزة غير واحد بمسدس و يضربها طلقه ف دماغها

هو أنا ليه باكتب بالعامية ؟

المهم

كل سنه و أنتم .. أى حاجه